Landsverk: Tunlarnir kosta 300 mió. kr. næstu tíggju árini

Landsverk heldur fast um, at tað fer at kosta 300 mió. kr. næstu tíggju árini, um Vágatunnilin og Norðoyatunnilin skulu latast Landsverki at varða av.

Landsverk hevur kunnað politiska myndugleikan um tað.

Landsverk sigur, at tunlarnir báðir kosta 11 millónir krónur um árið í rakstri og viðlíkahaldi. 

Men Landsverk sigur eisini, at nú byrjar at verða átrokandi at endurnýggja tekniska útbúnaðin í undirsjóvartunlunum.

Sigurd L. Lamhauge

Sigurd L. Lamhauge er stjóri á Landsverki.

Útbúnaðurin ikki við

Sigurd L. Lamhauge, stjóri á Landsverki, sigur, at tá Marjus Dam vísir á, at Landsverk í samferðsluætlanini hevur rakstur og viðlíkahald fyri styttri undirsjóvartunlar at kosta 775 kr. um árið fyri meturin, er tað púra rætt. 

Tað er kostnaðurin fyri vanligan rakstur og fyri alt vanligt viðlíkahald í 2018 prísum.

Tekniski útbúnaðurin, sum krevur endurnýgging, er ikki við í teimum tølunum, sigur Sigurd L. Lamhauge.