Turkaland fer ikki at góðkenna svenskan Nato-limaskap

Turkiski forsetin, Recep Tayyip Erdogan, sigur í dag, at Svøríki ikki skal vænta, at Turkaland fer at góðkenna umsóknina um limaskap uttan so, at landið sendir yvirgangsfólk heimaftur.

Erdogan hevur sagt fyrr,  at hann vil hvørki hava Finnland ella Svøríki upp í Nato, tí londini stuðla yvirgangsfólkum.

Við "yvirgangsfólkum í útlandinum" sipar hann partvíst til kurdiska arbeiðaraflokkin PKK, sum er lýstur sum yvirgangsfelagsskapur í Turkalandi, í ES og USA. 

Hann sipar eisini til YPG, sum er kurdisk uppreistrardeild í Sýria, og sum hevur verið virkin í stríðnum at berja niður IS.

Hvørki Svøríki ella Finnland hava skrivað PKK á listan yvir yvirgangsfelagsskapir. 

Men turkiski sendiharrin í Noregi, Fazli Corman, segði við Verdens Gang í vikuni, at veruleikin er, at Svøríki, Finnland og Noreg eru tryggar havnir hjá PKK. 

- Har kann yvirgangsfelagsskapurin arbeiða, forvinna pening og misbrúka talufrælsið, sum var hetta eitt áhugafelag, segði Fazli Corman.