- Tíðindi, mentan og ítróttur
Føroyingar í Keypmannahavn halda stevnu í Norðhavnini
Um vikuskiftið vera bæði Norðoyastevnan í Klaksvík og Bátafestivalurin í Vestmanna.
Men eisini í Keypmannahavn verður skipað fyri stevnu, tí í morgin verður Norðhavn Regatta.
Tað eru tvey ár síðani seinasta Norðhavn Regatta seinast bleiv fyriskipað orsakað av koronafarstóttin, og tí gleða føroyingar í Danmark seg nógv til at møtast í Norðhavnini í morgin.
Kappróður á skránni
Tað er Róðrarfelagið Tvørábáturin, ið heldur til í Nordhavini, sum skipar fyri, og eingin stevna uttan kappróður.
Róðrarfelagið Tvørábáturin hevur sjálvt fimm manningar, men tað verður væntað, at manningar úr hinum fimm róðrarfeløgunum í Danmark eisini fara at luttaka, so at tað tilsamans verða einar 10-12 manningar.
Og tað verður nógv gjørt burtur úr at gera tað høgligt hjá fólki at fylgja við kappróðrinum, tí á strondini verða tíggju leðursofum settar upp.
Størsta regatta nakrantíð
Føroyingarnir í Keypmannahavn fara eisini at hava eitt vakið eyga við kappróðrinum á Norðoyarstevnuni, tí kappróðurin verður sendur beinleiðs á stórskíggja í hølunum hjá Tvørábátinum.
Sambært fyriskiparunum, so er tað størsta Norðhavn Regatta nakrantíð, og tiltøk eru til fólk í ymsum aldri.
Tað verður Virgar Dalsgaard, ið fer at seta Norðhavn Regatta 2022, og sum nakað nýtt, so verður fyri fyrst ferð skipað fyri uttandura gudstænastu á regattaini, har Borgny Brüning-Hansen, prestur úr Dali, fer at prætika.
Nógv undirhald
Nógv undirhald er eisini á skránni.
Janus á Húsagarði undirheldur á strondini við sangi, gittara og munnhørpu.
Seinni verður felagssangur í einum telti við felagshúsið hjá Tvørábátinum, har Hans Petur í Brekkunum syngur fyri, og Tummas Niclasen spælir undir við harmonikuni.
Johan í Kollafirði hevur show við sangi og keyboard, og seinni spælir Hans Petur í Brekkunum góðan tónleik á saksofonina hjá sær. DJ og barr verður út á náttina.