Landskassaskuldin minkað 200 mió. kr.

Skuldin hjá landskassanum er minkað 200 milliónir kr., eftir at eitt lán, sum er 1,3 milliardir kr., er goldið aftur, upplýsir Landsbankin.

Lánið er afturgoldið við at endurfíggja 1,1 mia. kr. og við at rinda 200 mió. kr. av landskassans gjaldføri.

18. mai tók landsstýrið eitt tvey ára lánsbrævalán upp á 1,1 mia. kr. Lánið er nýtt til at rinda skuld aftur við, sum fellur til gjaldingar í dag, ein endurfígging. 

Skal vera 15% av BTÚ

Haraftrat rindar landskassin 200 mió. kr. av gjaldførinum, og tískil minkar landskassans skuld 200 mió. kr. 

Landskassans gjaldføri skal sambært lóg vera 15% av BTÚ, og tað svarar í 2022 til góðar tríggjar mia. kr. Landskassans gjaldføri hevur í ár í miðal verið góðar 3,4 mia. kr., sum er væl oman fyri lógarkravið. Tí var mett ráðiligt at nýta 200 mió. kr. av  gjaldførinum at rinda skuld niður við, sigur Landsbankin.

Nú skuldin er minkað við 200 mió. kr., verður lánsbrævaskuldin hjá landskassanum 3.743 mió. kr., sum eru 18% av bruttotjóðarúrtøkuni við ársenda í fjør.