Seks ár eftir frágreiðing verður príssamanbering almannakunngjørd

Kappingareftirlitið hevur avgjørt at almannakunngera hagtølini um oljuprísir, sum Kappingareftirlitið hevur, nú oljuprísirnir eru alsamt frammi í fjølmiðlunum.

Kappingareftirlitið sigur, at tað er altíð ein møguleiki, um virkin kapping ikki er á einum marknaði, at príshækkanir gerast hægri enn innkeypsprísir geva orsøk til.

Kappingareftirlitið staðfesti í frágreiðingini “Oljumarknaðurin í Føroyum - frágreiðing um sølu av brennievnum í Føroyum”, sum var almannakunngjørd í 2016, at føroysku oljuprísirnir vóru høgir, og at vantandi kapping helst var orsøkin.

Kappingareftirlitið mælti tá til at skapa umstøður fyri betri kapping við at áleggja verandi oljufeløgum eina samhandilsskyldu í sambandi við heilsølu. 

Hetta vildi gera tað lættari hjá nýggjum feløgum at koma inn á marknaðin fyri smásølu.

Prísirnir samanbornir

Kappingareftirlitið hevur síðani frágreiðingina í 2016 hildið eyga við føroysku oljuprísinum. 

Prísirnir eru dagliga tiknir niður av heimasíðunum hjá oljufeløgunum, og við millumbilum samanbornir við viðkomandi samanberingargrundarlag.

Hesi hagtøl almannakunnger Kappingareftirlitið nú. 

Í fyrstu syftu er talan um prísgongdina fyri bensin, diesel og gassolju, sum verður samanborin við prísgongdina hjá Brent ráolju. Tann samanberingin gevur ábending um gongdina á innkeypsprísinum hjá føroysku oljufeløgunum. 

Heimasíðan hjá Kappingareftirlitinum er kapping.fo.