Sjúklingaráðið minkar

Sjúklingaráðið skal minka úr níggju limum niður í fimm.

Tað var samtykt í løgtinginum fyri tveimum mánaðum síðani, og nú er gjørt uppskot um kunngerð um tað.

Smidligari verður hjá ráðnum at hava fundir, um bara fimm limir eru.

Sjúklingaráðið skal geva landsstýrisfólkinum ráð um uppskot um lógir og kunngerðir, sum hava týdning fyri veitingar til sjúklingar, og viðgera mál, sum hava generellan og prinsipiellan týdning fyri veitingar til sjúklingar.

Sjúklingaráðið kann ikki viðgera ítøkilig persónsmál.

Landsstýrisfólkið velur limirmar í Sjúklingaráðið millum annað eftir uppskoti frá feløgum og áhugabólkum, sum umboða sjúklingar á sjúkrahúsunum.

Sjúklingaráðið letur í seinasta lagi 1. apríl landsstýrisfólkinum ársfrágreiðing um sítt arbeiði.

Og tað skal hava minst tveir fundir við landsstýrisfólkið um árið.