U20: Føroyar vunnu á Póllandi

Føroyska unglingamanslandsliðið vann fyri løtu síðani ein trivaligan 38-32 sigur á Póllandi. 17-ára gamli Óli Mittún var stórspælandi, og hann bleiv eisini kostin besti føroyski leikari í dystinum í dag. 

Óli Mittún skoraði seks mál í dystinum. Toppskorari á føroyska liðnum var Hákun West av Teignum við sjey málum.

Dysturin var avgerandi fyri, um Føroyar kunnu vinna seg millum liðini, ið vinna sær rættin at vera við í HM-endaspælinum fyri U-21 landslið næsta summar.

Eftir sigurin skulu Føroyar nú spæla um at enda einastaðni millum nummar níggju og tólv í endaligu røðini. Og fremstu tíggju liðini sleppa við í HM-endaspælið fyri U-21 landsliðið næsta summar. Sostatt er møguleikin hjá Føroyum at koma við til HM-endaspælið enn opin.

Trettan tey fremstu sleppa við í EM-endaspælið fyri U-20 landslið næsta ár, og tískil eru Føroyar tryggjaðar luttøku til U20 EM-endaspælið næsta ár. 

Fríggjadagin og leygardagin skulu Føroyar aftur í eldin, og tá skulu endaligu plássini avgreiðast. Mótstøðuliðið er ikki funnið enn. Tó er greitt, at Føroyar skulu hitta vinnaran av bólki I2, og har er spenningur um fyrsta plássið millum Ísland og Italia.

Við sigrinum í dag hava Føroyar vunnið tríggjar dystir og tapt tveir higartil í EM-endaspælinum.