Danmark tapt mál um feta-ost í ES-rættinum

Hægstirættur í ES hevur staðfest, at Danmark ikki kann lata donsk feløg brúka navnið á kenda grikska ostinum feta á ostum, sum verða útfluttir uttanfyri ES.

Grikkaland tvíheldur, at feta er partur av mentanararvinum, tí Grikkaland hevur framleitt ostin úr geitarmjólk í meira enn 6.000 ár. Tí kann bara ostur, sum er framleiddur í Grikkalandi ella Kýpros, eita feta. Og hesum tók dómari í hægsta rætti í ES undir við. 

- At Danmark ikki hevur steðgað nýtsluni av heitinum feta fyri ost, sum skal útflytast til onnur lond, merkir, at Danmark hevur mishildið sínar skyldur sambært ES-lóggávu, segði dómarin.

Danmark meinti hinvegin, at reglan einans var galdandi, tá ið útflutt var til lond í ES og ikki til lond uttanfyri ES, sum Danmark annars hevur gjørt. Ostarnir, sum vera seldar í Danmark og útfluttir til ES, eru millum annað kallaðir "Salat-ostur", meðan heitið verður skift um við eitt nú "Danskur feta-ostur" á ostum, sum verða útfluttir aðra staðni.  

Men eisini hesin útflutningurin skal nú steðga. 

Tað var í 2002, at feta gjørdist eitt vart heiti. Og síðani hevur heitið verið tilskilað ostar frá serstøkum økjum í Grikkalandi og Kýpros. Onnur dømi um slík vard heiti eru eitt nú sjampanja úr Champagne og parmaskinka úr Parma.

Grikkaland framleiðir meira enn 120.000 tons av feta um árið.