Trump: Olja, gass og málmur bíðar okkum í Grønlandi

Risastórar olju-, gass- og málmleitingar fara skjótt at byrja í okkara nýggja og vakra Grønlandi!

Soleiðis byrjar amerikanski forsetin Donald Trump eitt uppslag á hansara egna sosiala miðli, Truth Social, í morgun.

Hann sigur, at sambært serfrøðingum er meira lætt atkomilig olja í Grønlandi enn í næstan øllum øðrum londum.

Avtalan, sum USA, Danmark og Grønland gjørdu 22. september, sigur einki um leiting eftir ráevnum í grønlendsku undirgrundini, og hon gevur ikki USA rætt til at leita eftir ella yvirtaka grønlendsk ráevni. Talan er fyrst og fremst um eina verjuavtalu, sum gevur USA loyvi til at gera tvær nýggjar herstøðir í Grønlandi.

Eingi oljuleitingarloyvi í Grønlandi eru latin síðan 2021, men nøkur loyvi, sum eru eldri enn tað, eru framvegis galdandi. Hesi leitingarloyvini geva tó ikki av sær sjálvum loyvi til at bora ella taka oljuna upp.

screenshot_trump_ts.jpg