Nú ber til at bíleggja tíð til blóðroynd á Landssjúkrahúsinum

Nú kanst tú bíleggja tær tíð á netinum til at taka blóðroynd,  áðrenn tú fert á Ambulatoriið á Landssjúkrahúsinum.

Bíleggingin fer fram á sama hátt, sum tá ið tú kundi bíleggja tær tíð til koronukanning og koppseting hjá Sjúkrahúsverkinum.

Tíðir kunnu bíleggjast 10. hvønn minutt, frá klokkan 8 á morgni til 13:50 seinnapartin. 

Tá ið tú hevur bílagt tær tíð, fært tú eini SMS-boð við einum tali, tú skalt brúka, tá ið tú fert at taka blóðroynd ella EKG.

Fólk kunnu framvegis møta á Landssjúkrahúsinum til blóðroyndir uttan at hava bílagt tíð frammanundan.

Til ber at bíleggja tíð á netinum eina viku fram, sigur Landssjúkrahúsið.

Bíleggingarskipanin er ikki spildurnýggj. Í tvey ár hevur borið til at bílagt sær tíð til blóðroynd á Klaksvíkar sjúkrahúsi.