Vøksturin hjá útlátinum er minkaður eitt vet

CO2 útlátið í Føroyum var  1,3 mió. tons í fjør. Vøksturin er eitt prosent minni enn árið fyri.

Vøksturin er nógv minni enn fýra undanfarnu árini, serliga í 2017, tá útlátið vaks 18 prosent og í 2018, tá vøksturin var níggju prosent, upplýsir Umhvørvisstovan. 

Útlendsk fiskiskip, sum bunkra í Føroyum, eiga 300.000 tons av útlátinum í fjør.

85 prosent av útlátinum koma frá brennievni, olju og øðrum. 

Brennievni telur við hvørt ár, men nýggjar keldur í fjør eru lendisnýtsla, sum er trý prosent.

Talan er um drenað graslendi, bø og haga.  

Nýggjar keldur

Aðrar nýggjar keldur eru metan frá tyrvingarplássum og láturgass frá spillvatni.

Ein orsøk til, at útlátið ikki økist eins nógv og undanfarin ár, er, at oljunýtslan er minkað, sigur Umhvørvisstovan. 

Ídnaðurin brúkti til dømis 20 prosent minni tungolju.

Og SEV brúkar ikki so nógva olju nú, so hvørt sum meira varandi orka er.

Fiskiflotin eigur okkurt um helvtina av útlátinum.