Frágreiðing um havbit og laks kemur í heyst

Hálvt fimta ár eftir, at løgtingið samtykti, at ein frágreiðing um havbit og laks skuldi gerast, kemur frágreiðingin væntandi í oktober í ár.

Løgtingið samtykti í apríl 2018 eitt uppskot til samtyktar hjá Sambandsflokkinum um at seta ein serfrøðingabólk at kanna og gera frágreiðing um laks og havbit og um skeljaaling. 

Bólkurin skuldi fara undir sínar kanningar skjótt, var samtykt tá á vári 2018.

Fyrr fiskaðu føroysk skip nógvan laks við línu norðanfyri. Laksurin vaks upp har, til hann fór aftur til lands at gýta.

Væl kent uttanlands

Havbit er væl kent í øðrum londum, til dømis í norðara partinum í Japan, har útróðrarbátar fiska laksin, tá hann kemur inn at landi at gýta.

Klekistøðir á landi eru í høvuðsheitum berandi undir hesum laksafiskiskapinum.

Serfrøðingarnir skulu eisini kanna, um jákupsskeljar kunnu alast í Føroyum.