NCC borar ikki Fámjinstunnilin

NCC borar ikki Fámjinstunnilin
J&K Petersen hevur funnið nýggjan undirveitara, sum er ein norsk fyritøka, ið hevur drúgvar royndir at bora tunlar
Tá Sigurd L. Lamhauge, stjóri í Landsverki, og Stein Olvur Petersen, stjóri í J&K Petersen, skrivaðu undir sáttmálan um Fámjinstunnilin. Nú er greitt, at NCC fer ikki at bora tunnilin.
 
22.08.2022 - 18:19

J&K Petersen skal hava annan undirveitara til at bora Fámjinstunnilin.

NCC, sum eftir ætlan skuldi bora tunnilin, hevur tikið seg burtur úr uppgávuni.

Tað váttar Stein Olvur Petersen, stjóri fyri J&K Petersen.

J&K hevði lægsta tilboðið, tá arbeiðið at gera Fámjinstunnilin varð bjóðað út á øðrum sinni.

Men J&K Petersen skrivaði ongantíð undir sáttmála við undirveitaran NCC, sum nú kortini ikki skal bora tunnilin.

 

Fámjinstunnilin skal verða liðugur í 2024, og tíðarætlanin heldur, sigur Stein Olvur Petersen, stjóri í J&K Petersen.

 

Landsverk skal góðkenna

Stein Olvur Petersen upplýsir, at tey hava funnið ein nýggjan undirveitara fyri NCC.

Talan er um eina norska fyritøku, ið hevur drúgvar royndir at bora tunlar. Landsverk skal góðkenna undirveitaran, og teir formalitetirnir eru  ikki komnir uppá pláss enn. Tí vil Stein Olvur Petersen ikki upplýsa, hvør nýggi undirveitarin er.

- Men eg kann vissa um, at tunnilin verður ikki dýrari av hesi orsøk, og tíðarætlanin heldur, sigur Stein Olvur Petersen.

Hann leggur dent á, at J&K og NCC framhaldandi hava gott samstarv, hóast samstarvið um Fámjinstunnilin var av ongum.

 

Liðugur í 2024

Fyrr í summar upplýsti Landsverk, at fyrsta skotið fyri Fámjinstunnilin verður skotið seinni í heyst, og øll verkætlanin verður liðug miðskeiðis í 2024.

Løgtingið hevur játtað 207 milliónir krónur til samlaðu verkætlanina.

Tað hevur ikki eydnast Kringvarpinum at fáa viðmerking frá Landsverki, sum er byggiharri.


 

Er kopiera
Nýggjastu sendingar í ÚV
Fríggjadag 20. november
Vikuskiftið 20 nov 2026
216752
Fríggjadag 20. november
LEITISSTEIN 20.11.2026 (Linda Andrews)
216750
Fríggjadag 20. november
Breddin: Leigubústaðir og skattafyrimunir
216730
Fríggjadag 20. november
Beinleiðis úr Studio 5 - Nettupp
216723
Fríggjadag 20. november
RagnarRokk:Chris Flynn um Dreams of the Disappeared
215804
Nýggjastu sendingar í SV
Fríggjadag 20. november
Dagur og vika - teknmálstulkað
216714
Fríggjadag 20. november
Veðrið
216748
Hósdag 19. november
Veðrið
216688
Hósdag 19. november
Silja millum strokini
216631
Mikudag 18. november
Dagur og vika - teknmálstulkað
216592