Metrostav Norge skal bora Fámjinstunnilin

Felagið hevur drúgvar royndir í tunnilsarbeiði

Tá Metrostav Noreg og J&K Petersen skrivaðu undir sáttmálan um, at norska felagið skal bora Fámjinstunnilin.

Mynd: J&K Petersen.

29.08.2022 - 15:16

Sáttmáli var í morgun undirskrivaður millum J&K Petersen og Metrostav Norge at bora tunnilin millum Øravík og Fámjin. Hetta hendir eftir, at NCC, sum skuldi bora tunnilin, í síðstu viku tók seg burtur úr uppgávuni.

Nýggi undirveitarin skal bora, tryggja og vatntryggja nýggja tunnilin millum Øravík og Fámjin.

Metrostav Norge hevur drúgvar royndir í tunnilsarbeiði.

5.000 starvsfólk

Móðurfelagið, Metrostav, er eitt stórt miðevropeiskt byggifelag við nærum 5.000 starvsfólkum og verkætlanum í 15 evropeiskum londum, skrivar J&K Petersen á heimasíðuni.

Fyrr í summar upplýsti Landsverk, at fyrsta skotið fyri Fámjinstunnilin verður skotið seinni í heyst, og øll verkætlanin verður liðug miðskeiðis í 2024.

Løgtingið hevur játtað 207 milliónir krónur til samlaðu verkætlanina.

Hoyr samrøðu við Stein Olv Petersen, stjóra í J&K Petersen, í útvarpstíðindunum:

30082022_Stein_Olvur_til_net