Djúpvatnsbumba frá krígsárunum skal spreingjast í Viðvík

Ein djúpvatnsbumba hevur ligið í Viðvík í yvir 80 ár, men í dag skal hon spreingjast.

Eftir ætlan skuldi ein djúpvatnsbumba spreingjast um eitt-tíðina nú seinnapartin, men vánaligt telefonsamband er á leiðini, so enn vita vit ikki, um bumban er sprongd.

Fólk, sum eru kend í Viðvík, hava eisini boðað frá, at eitt skriðulop hevur verið í økinum í vikuni. 

Tí mugu fólkini frá Arktisk Kommando fyrst tryggja sær, at bumban ikki liggur undir mold, eyri og gróti.

Tað sigur Bárður Sandá, ovasti í Arktisk Kommando í Føroyum.

Harumframt skal ein annar lutur kannast, sum eisini kann innihalda spreingievni.

Átta fólk doyðu í flogvanlukkuni
Tað var langafríggjadag, 23. apríl 1943, at eitt bretskt Catalina-flogfar datt niður í Viðvík.

Í bókini Stríðsárini greiðir Niels Juel Arge frá, at Søren Sørensen av Viðareiði var í haganum hendan dagin og hugdi eftir seyði, tá hann hoyrdi eitt buldur, og sá flogfarið renna á eina rók.

Hann boðaði frá vanlukkuni, og menn fóru at leita eftir fólkunum umborð.

Men eingin slapp livandi frá vanlukkuni. Átta fólk lótu lív.

Hoyr innslag her:

mynd_av_flogfari_1.png

mynd_av_flogfari_2.png

fc5ebf00-20cf-489a-9b0c-a94eb83eb128_1.jpg