H71 skal til Serbia

Mansliðið hjá H71 skal spæla ímóti RK Partizan úr Serbia í 2. umfari av European Cup-kappingini hjá EHF

Føroysku greipuvinnararnir, H71, skulu til Serbia í European Cup

06.09.2022 - 10:16

H71 skal til Serbia í European Cup.

Hoyvíkingar komu úr bollanum saman við RK Partizan, tá lutakast var hjá EHF fyri løtu síðan.

Liðini bæði hittast í 2. umfari av kappingini hjá evropeisku hondbóltssamgonguni.

Dystirnir skulu avgreiðast millum 29. oktober og 6. november, skrivar Hondbóltssambandið á Facebook.

ÍBV úr Íslandi, har Dánjal Ragnarsson og Janus Djurhuus spæla, skulu spæla ímóti ukreinska liðnum, Donbas, um teir fyrst vinna á Holon HC úr Ísrael í 1. umfari.

Nicholas Satchwell og Allan Norðberg í KA í Akureyri skulu spæla ímóti vinnaranum av dystinum í 1. umfari ímillum Argous úr Grikkalandi og HC Fivers WAT Margareten úr Eysturríki.

IK Sävehof fekk franska mótstøðu

Elias á Skipagøtu og Óli Mittún í IK Sävehof fingu franska mótstøðu í 2. umfari í European League.

Svensku steypavinnararnir úr Partille skulu spæla ímóti Montpellier HB um pláss í bólkaspælinum.

Skanderborg-Aarhus við Hákun West av Teigum á liðnum brestir saman við IFK Kristianstad úr Svøríki.

Jóhan á Plógv Hansen og nýggja felag hansara, SG Flensburg-Handewitt, fekk polska mótstøðu í 2. umfari.

MMTS Kwidzyn stendur ímillum dugnaliga vongin og bólkaspælið í European League.