Tekur sum givið at tulkingin í Vinnumálaráðnum verður fylgd

Løgmaður "tekur sum givið", at Uttanríkis- og Mentamálaráðið fylgir tulkingini hjá Umhvørvis- og Vinnumálaráðnum um navnalógina, tí Umhvørvis- og Vinnumálaráðið eigur lógina, og hevur tí tulkingarrættin.

Tað sigur hann í svari til Hervør Pálsdóttur, løgtingskvinnu.

Løgmaður sigur tó einki um, at tvær tulkingar eru í Umhvørvis- og Vinnumálaráðnum.

Umhvørvisstovan, sum er navnamyndugleiki, sigur, at navnalógin ikki umfatar sammøður, soleiðis, sum hon nú er orðað.

Tað var longu 10. juni.

Hervør Pálsdóttir, sammóður

Hervør Pálsdóttir, løgtingskvinna. (Mynd: Bjarni Árting Rubeksen)

Kunnu fáa eftirnavnið hjá sammóður

15.august segði Magnus Rasmussen, landsstýrismaður í umhvørvis- og vinnumálum, at hóast hugtakið sammóðir ikki var við, tá navnalógin var samtykt, kunnu børn sambært lógini fáa eftirnavnið hjá sammóður.

Tí er ikki neyðugt at broyta lógina.

Hervør Pálsdóttir spyr, um tað er í móti vilja løgtingsins, sum hevur samtykt navnalógina, at  landsstýrismaðurin í mentamálum ikki gevur fólkakirkjuni boð um at skráseta børn saman við sammøðrum í kirkjubókina.