Spírar skulu vera um tey gomlu á røktarheimum

Tórshavnar kommuna fer nú undir eina royndarverkætlan við spírum, har 14 - 17 ára gomul skulu vera um tey eldru á røktarheimunum í kommununi.

Uppgávurnar hjá teimum ungu, sum verða nevnd spírar, eru eitt nú at spæla spøl, fara gongutúrar, lesa bløð ella bøkur, baka ella práta við tey gomlu.

Spírarnir verða settir í eitt íblástrarstarv, har endamálið er at økja um vitanina um og áhugan hjá teimum ungu at arbeiða við eldri fólki.

Tórshavnar kommuna byrjar við at seta ung fólk í starv á Tjarnargarði við Hoyvíksvegin, tveir tímar hvønn gerandisdag.

Ætlanin er eisini at seta ungfólk á fleiri øðrum røktarheimum í kommununi, tá ið royndarverkætlanin er endurmett um eitt hálvt ár.