Øll ullin verður seld í Føroyum

Neyðugt verður ikki hjá Búnaðarstovuni at selja ullina av landinum í ár. Í fjør varð hon seld til Onglands.

- Vit hava í ár fingið boð upp á alla ullina úr Føroyum, sigur Dorthea Joensen, ið stendur fyri ullarmóttøkuni.

Ein av orsøkunum til, at tað er eydnast at fáa føroyskar keyparar til ullina, er burðardygd, sum er nógv frammi í løtuni.

Hoyr innslag í útvarpstíðindunum:

Hetta er sætta árið, at Búnaðarstovan tekur ímóti ull, og í ár fekk hon 34 tons.

26 tons er fyrsti flokkur, fýra tons er annar flokkur, og fýra tons vórðu koyrd burtur.

Samlaða nøgdin í ár er størri enn undanfarin ár, tá ið talið hevur verið millum 24 og 29 tons.

Freistin at lata Búnaðarstovuni boð upp á ullina var 20. oktober, og keypararnir fáa boð seinni í vikuni.