ST: Bæði Russland og Ukraina pína fangar

Bæði Russland og Ukraina hava pínt krígsfangar í sambandi við kríggið í Ukraina, er niðurstøðan hjá hákommisserinum í mannarættindum hjá ST.

Tað skrivar Reuters. Kríggið hevur vart í níggju mánaðir.

Niðurstøðan kemur, eftir at ein sendinevnd hjá ST hevur verið í Ukraina og kannað málið. Sendinevndin hevur gjørt samrøður við fleiri enn 100 krígsfangar hjá báðum pørtum.

ST sendinevndin fekk ikki loyvi at gera samrøður við ukrainsku krígsfangarnir fyrr enn teir vóru latnir leysir, tí Russland bannaði ST atgongd til fangarnar, tá ið teri sótu í fongsli.

Sambært ST hava bæði londini pínt fangar við elektrosjokki

Russland vísir ákærunum aftur, og sigur seg hvørki hava pínt fangar ella farið illa við teimum.

Ukraina hevur fyrr boðað frá, at um fangar eru píndir, so verða øll brot kannað og rættarmál verða reist.