Fekk 17 uppskot til fimm limir í Sjúklingaráðnum

Landsstýrismaðurin fekk 17 uppskot, tá hann skuldi velja fimm limir í Sjúklingaráðið.

Uppskotini vóru frá sjúklingafeløgunum og MEGD.

Tað sigur Kaj Leo Holm Johannesen, landsstýrismaður, í svari til Eyðgunn Samuelsen, løgtingskvinnu, sum spurdi millum annað, hví summi øki, eitt nú Norðoyggjar, ikki eru umboðað í ráðnum. 

Í ráðnum eru tvey fólk úr Suðurstreymi, eitt úr Eysturoynni, eitt úr Vágum og eitt úr Suðuroynni. 

Einki uppskot

Eingin úr Norðoyggjum ella úr Sandoynni var millum uppskotini, landsstýrismaðurin fekk, sigur Kaj Leo Holm Johannesen.

Í Sjúklingarráðnum eru Jákup N. Olsen, Hilmar Augustinussen, Emil Michelsen, Poula Reinert Olsen og  Hergerð Joensen.

Eyðgunn Samuelsen ger eisini vart við, at eingin í ráðnum umboðar hjartasjúkur og diabetessjúkur.