Ætla ikki at lata sendistovu í Russlandi aftur

Eingin ætlan er í løtuni um at lata føroysku sendistovuna í Russlandi aftur.

Tað sigur Uttanríkis- og Mentamálaráðið í svari til fíggjarnevndina hjá løgtinginum.

Men fylgt verður við gongdini og mett verður áhaldandi um støðuna. 

Spurningurin er eisini tengdur at útlitunum fyri gongdini í samstarvi og samhandli millum Føroyar og Russland.

Eingin handilssáttmáli fyribils

Arbeiðið hjá sendistovuni í Moskva fyri handilssáttmála við Evro-asiatiska búskaparsamveldið er fyribils steðgað.

Einasta land, sum hevur latið sendistovu sína í Russlandi aftur, er Ukraina, sum kvetti øll diplomatisk sambond sama dag, sum Russland gjørdi innrás, sigur Uttanríkis- og Mentamálaráðið. 

Um ætlaðu sendistovuna í Washington verður sagt, at fyrireikingarnar eru byrjaðar, men eingin fígging er.