Kringvarpið sendir tvær valsendingar úr Norðurlandahúsinum samstundis

Effektivt ella ei. Valkvøldið fær kringvarpsgjaldarin høvið at síggja og hoyra tvær valsendingar samstundis. 

Tann stóra valsendingin hjá Kringvarpi Føroya verður sum vant send í sjónvarpinum, har John Johannessen leiðir kvøldið saman við Doris Bjarkhamar, stjórnmálafrøðingi, ið er viðmerkjari. Aftur at sær hava tey Regin Reinert og Flóvin Eidesgaard, sum gera forsagnir.

Sum nakað nýtt, so halda flokkarnir til í Norðurlandahúsinum, og har er Elin Winther Poulsen vertur og Jóannes Hansen viðmerkjari.

Sólstein, Vatnhamar, Koba og Matras

Útvarpið sendir eisini frá valinum.

Kári Sólstein og Tróndur Vatnhamar eru høvuðsvertir, eins og teir vóru til fólkatingsvalið í heyst.

Aftur at teimum vera Finnur Koba og Sámal Matras, sum fara at greina og viðmerkja hagtølini, so hvørt tey koma inn.

Eitt innslag um ta ordiligu valsendingina bleiv gjørt í sambandi við fólkatingsvalið 31. oktober:

Fara at kappast

Sum skilst ætla báðar redaktiónirnar at kappast um at vera fyrst at kunngera innkomnu tølini og at fáa viðmerkingar frá nývaldum og falnum løgtingslimum.

At hjálpa teimum vera reportarar frá ungdómsredaktiónini BIIT.fo í Norðurlandahúsinum, sum er karmur um valkvøldið hesa ferð.

Útvarpssendingin "Tann ordiliga valsendingin" verður filmað og stroymd á netinum.

Hvat: Tann ordiliga valsendingin
Hvar: í útvarpinum og á KvF.fo
Nær: Hóskvøldið 8. desember kl. 18.17