Eitt línuskip og eitt minni ísfiskalínuskip eru til fiskiskap

Tey fáa eina blanding av toski, hýsu, longu, brosmu og so nakað av øðrum fiskasløgum.  

Fiskamarknaðurin væntar ikki nógvan útróður í næstu viku, tí streymurin er harður fyrst í vikuni, men batnar seinni í vikuni - tó verður umleypandi veður. Størru útróðrarbátarnir gera tó helst onkran túr, og teir fáa mest av hýsu og so nakað av toski. Ein djúpvatnstrolari er á svartkalvaveiðu.

Hjá partrolarum eru flestu pørini til fiskiskap. Øll fiska upsa, men fáa eisini eitt sløð av hvítum fiski, serliga longu og hýsu. Tað er smáligt fiskarí, men okkurt gott hálið er inn ímillum, skrivar Fiskamarknaðurin.

Eingin trolbátur er úti, tí veðrið verður sera skiftandi, so tað er ivasamt, nær teir fara út. Tvey garnaskip fiska svartkalva og hava brúkiligan fiskiskap.

Eitt fiskar havtasku, og hjá tí er fiskiskapurin smáligur, skrivar Fiskamarknaðurin í meting síni fyri næstu viku.