Mótmælisfólk í Nólsoy eru framvegis skuldsett

Tey fimm fólkini, sum fyri skjótt hálvum fjórða ári síðani skipaðu fyri mótmælistiltaki við ferjuleguna hjá Ternuni í Nólsoy, eru framvegis skuldsett. 

1. september 2019 var m.a. skipað fyri, at innsiglingin til ferjuleguna var avbyrgd, so Ternan slapp ongan veg.

Spenta støðan millum nólsoyingar og skiparan á Ternuni hevði við sær, at Ternan lá við ferjuleguna í fleiri tímar, og ferðafólk sluppu hvørki í land ella umborð.

Trý brot

Tey fimm eru skuldsett fyri trý brot á revsilógina. 

- Tað er brot á §119, stk. 3, sum er fyri at hava forða einum persóni at útinna sína almennu tænastu- ella starvsskyldu, 

- fyri §134, A - tað er fyri í felagsskapi ella eftir sínámillum avtalu at hava luttikið í grovum ónáðum á almennum staði 

- og fyri §193 í revsilógini - tað er fyri á løgleysan hátt hava elvt til umfatandi órógv í rakstrinum av vanligum samferðslutólum. 

Michael Boolsen, fúti

Michael Boolsen, fúti. (Mynd: Bjarni Árting Rubeksen)

Málið verður framvegis viðgjørt

Revsiramman fyri brot á §119, stk.3  og §134, A eru ávíkavist sekt ella fongsil í upp til 6 mánaðir og hálvt annað ár, meðan brot á §193 kann revsast við sekt ella fongsli í upp til 6 ár.

Michael Boolsen, fúti, sum hevur málið um hendi, sigur í dag, at nakrar løgfrøðiligar kanningar eru eftir at gera í málinum.

Annað fær hann ikki sagt um málið.