Sam bar við grótkastið og er farin á sleipistøð

Strandfaraskipið Sam er tikið upp á beding í Havn seinnapartin, eftir at skipið bar við grótkastið á Syðradali í morgun.

Eingi ferðafólk vóru við.

Reglurnar eru, at í slíkum føri skal skipið takast upp til kanningar. 

Pláss var ikki á Klaksvíkar sleipistøð, og tí var siglt til Havnar, har Sam seinnapartin var tikin upp á skipasmiðjuna Mest.

Ekkolodd-botnurin fingið skaða

Kanningar vísa, at botnurin hevur fingið tvær buklur, og at ekkolodd-botnurin hevur fingið skaða.

Eykalutir eru bílagdir, og teir koma til landið í annaðkvøld. 

Sam fer væntandi í sigling aftur hósdagin.

Erla Kongsdóttir, Erla Kongsdóttir í Klaksvík

Erla Kongsdóttir røkir siglingina fyri Sam fyribils.

Erla Kongsdóttir siglir

Meðan Sam er á sleipistøð, røkir Erla Kongsdóttir siglingina á leið 56 millum Klaksvík og Syðradal. 

Av tí at rampan ikki er klár at taka ímóti Erlu Kongsdóttir, verða bilar ikki tiknir við, sigur Jóan Petur Abrahamsen, tøkniligur leiðari á Strandferðsluni.