Graslíkið á fótbóltsvøllinum í Hoyvík skal skiftast

Sambært málslýsingini er avleiðingin av tí, at tað flýtur við leysum kunstgrasi kring allan vøllin, og tað hevur umhvørvisligar fylgir við sær. Og av tí at vøllurin losar so illa, so er onki graslíki eftir, fleiri støð á vøllinum. Víðari sæst í málslýsingini, at eitt mál um endurgjald fer fram millum Tórshavnar Kommunu og veitaran av hesum graslíki.

Men aðrir trupulleikar eru eisini við Hoyvíksvølli. Hallið á vøllinum er ov høgt, hann er hægstur á miðjuni. Tí skal allur vøllurin - tilsamans 8556 fermetrar til víddar, javnast betur. 

Enn veit kommunan ikki, hvat hetta arbeiði fer at kosta. 

Hóskvøldið samtykti ein meiriluti í Tórshavnar Býráð at taka av einum tilboði frá Føroya Møblasølu um at keypa nýtt graslíki til vøllin. 

Í fyrstu atløgu valdi meirilutin at játta fimm milliónir krónur til arbeiðið.

Minnilutin, tey fýra umboðini hjá Tjóðveldi í býráðnum, atkvøddi blankt.