Forsætisráðharrin upp í mál um ritstuldur

Norski forsætisráðharrin, Jonas Gahr Støre, fer nú upp í málið um skuldsetingarnar ímóti norska heilsumálaráðharranum, Ingvild Kjerkol.

Sambært NRK er sannlíkt, at Ingvild Kjerkol hevur snýtt, tá hon skrivaði sína masterritgerð á Nord-universitetinum. Uppgávan er í pørtum meinlík aðrari uppgávu, sum ein annar studentur skrivaði nøkur ár frammanundan.

- Eg havi tosað við Ingvild Kjerkol um tað, sum er komið fram um ritgerð hennara, um vikuskiftið. Nú ræður um at fáa fult yvirlit í hesum málinum. Eg skilji, at Nord-universitetið fer at kanna málið, og tað er gott, skrivaði Støre til norsku pressuna í gjárkvøldið. 

Sandra Borch

Sandra Borch noyddist at leggja frá sær sum ráðharri í norsku stjórnini. (NTB/Ritzau Scanpix)

Ráðharri lagt frá sær

Fríggjadagin mátti Sandra Borch, sum var ráðharri í útbúgving og gransking, leggja frá sær, tá tað kom fram, at hon í uppgávuni hevði brúkt tilfar hjá øðrum uttan at nevna keldur. 

Nú hevur NRK eftirkannað uppgávuna hjá heilsumálaráðharranum frá 2021 og er komið fram til, at fleiri brot í uppgávuni eru júst tey somu sum í einari uppgávu tvey ár frammanundan. Og hetta er ikki upplýst sum kelda.

Ingvild Kjerkol segði við NRK fyrrakvøldið, at uppgávurnar høvdu brúkt sama háttalag og endurgóvu tí úr somu lærubókum. 

Ikki bara háttalag

Men aðrir norskir miðlar vilja eisini vera við, at ritstuldurin fevnir um meira enn bert háttalagið.

Og verjan hjá heilsumálaráðharranum rínir ikki við serfrøðingar, sum NRK hevur tosað við.

- Teksturin líkist so nógv, at tað er ógvuliga ósannlíkt, at hesir báðir tekstirnir eru gjørdir óheftir av hvørjum øðrum, sigur John-Arne Skolbekken, professari á NTNU, sum er norska universitetið fyri tøkni og náttúruvísindi.