Ísland hóttir við at boykotta Grand Prix

Ísland umhugsar at boykotta evropisku songkappingina, Melodi Grand Prix, tí Ísrael er við.

Íslendska kringvarpið, RÚV, sigur, at avgerðin verður tikin leygardagin, tá ið íslendska Melodi Grand Prix'ið er liðugt.

Stjórin í RÚV, Stefan Eiriksson, sigur við svenska kringvarpið SVT, at hvassar atfinningar hava verið um kappingina, tí Ísrael er við, og at fleiri tónleikarar stúra. 

Hann sigur, at 10.000 íslendingar hava skrivað undir eina áheitan um, at Ísland fer úr kappingini um Ísrael er við.

Eisini í Finnlandi er mótstøða, og 1.300 finskir tónleikarar mótmæltu fyrr í hesum mánaðinum móti ísraelskari luttøku.

Finalan í evropisku sangkappingini í ár verður í Malmø 11. mai.