Amerikansk fyriskipan hóttir ísraelskar búreisingar

Amerikanski forsetin, Joe Biden, skrivaði í gjár undir eina fyriskipan - tað, sum í USA verður rópt ein 'executive order' - sum gevur USA møguleika at seta búskaparlig tiltøk í verk móti ísraelskum búreisingum, ið eru ákærdir fyri at nýta harðskap móti palestinum.

Tøl hjá ST vísa, at síðani álopið á Ísrael 7. oktober, er talið av dagligum álopum frá búreisingum nærum tvífaldað.

USA sigur í fráboðan, at Joe Biden hevur verið greiður um, at USA stuðlar ísraelska rættinum til at verja seg sjálvt og royndunum at niðurberja Hamas, so eitt tílíkt álop ikki hendir aftur. 

Stúrir fyri harðskapi

Men forsetin hevur eisini sagt seg stúra fyri vaksandi harðskapinum, sum hevur verið á Vestara áarbakka seinastu fýra mánaðirnar, síðani álopið 7. oktober.

Hesin harðskapurin er ein stór hóttan móti friði, trygd og støðufesti á Vestara áarbakka og í Miðeystri, og tað er eisini ein hóttan móti uttanríkispolitiskum áhugamálum hjá USA, verður sagt í fráboðanini úr Hvítu Húsunum.

Fyriskipanin ger millum annað, at USA kann leggja hald á amerikanskar ognir hjá viðkomandi fólkum.