Kyndil og Neistin á veg í finaluna

Kyndil og Neistin vunnu fyrru hálvfinalurnar í steypakappingini í gjár, og hava nú góð kort á hondini undan seinnu hálvfinalunum, sum verða um vikuskiftið. 

Kyndlakvinnurnar vitjaðu í Vestmanna, har tær vunnu 30-26 eftir hálvleiksstøðuna 13-14. VÍF var annars á odda, tá eitt gott korter var eftir, men útiliðið var betri seinastu løtuna.

Neistin tók ímóti H71, sum vann steypakappingina í fjør, og heimaliðið vann 30-27. Støðan í steðginum var 16-14. Eitt skifti í seinna hálvleiki var Neistin frammanfyri við sjey málum, men H71 fekk minkað um munin til trý.

Stórur spenningur hjá monnunum

KÍF vann eina spennandi og málfátæka hálvfinalu ímóti Neistanum í Havn. Dysturin endaði 20-19 eftir hálvleiksstøðuna 8-8. Hjá Neistanum darvaði tað, at Erik Karlsson fekk reytt kort longu eftir eitt korter.

Mikukvøldið vann VÍF við einum málið á Kyndli í Havn. Dysturin endaði 25-24 til vestmenningar.

Seinnu hálvfinalurnar verða spældar um vikuskiftið. VÍF og Kyndil spæla í Vestmanna leygardagin. Sunnudagin spæla KÍF og Neistin í Kollafirði. 

Hjá kvinnunum eru báðir returdystirnir sunnudagin.