Amerikanskur hjálparpakki til Ukraina og Ísrael

Amerikanska senatið hevur samtykt uppskot um at lata 95 milliardir dollarar í hjálparpakka til millum annað Ukraina og Ísrael.

Tað svarar til góðar 660 milliardir krónur.

Hjálparpakkin hevur verið nógv umrøddur av amerikonskum politikarum, og hóast senatið nú hevur samtykt uppskotið, skal uppskotið eisini samtykkjast í umboðsmannatinginum, har tað liggur nú, skrivar DR sambært CNN.

Donald Trump, sum stillar uppaftur til forsetavalið seinni í ár, hevur sagt, at fíggjarligi stuðulin eigur at verða veittur sum lán, sum skal rindast aftur.

Samtykkir umboðsmannatingið hjálparpakkan, skal peningurin millum annað brúkast til at stuðla Ukraina, veita Ísrael hjálp í trygdarviðurskiftum, og stuðul til humanitera hjálp í Gasa, á Vestara áarbakka og í Ukraina, skrivar danska kringvarpið.