Borgarstjórin vil hava frágreiðing frá landsstýrismanninum

- Hetta eru sera álvarsligar skuldsetingar og beinleiðis insinuering um, at avgerðir hjá borgarstjóra og kommunuleiðslu byggja á persónlig sambond og mutur.

Tað sigur Heðin Mortensen, borgarstjóri í Tórshavnar kommunu, sum roknar við at fáa eina frágreiðing frá Bjarna Kárason Petersen, landsstýrismanni.

Frihedsbrevet. fo skrivar, at Tórshavnar kommuna hevur givið byggifyritøkuni Articon fleiri uppgávur fyri samanlagt 385 milliónir, uttan at uppgávurnar eru bodnar út. 

- Tað kann tykjast sum, at tað eru persónligu sambondini, sum avgera, hvør fær hvørjar uppgávur, og tí sigur landsstýrismaðurin, at hann ætlar at taka málið um alment útboð upp politiskt, skrivar Frihedsbrevet.

Hesar ákærur vil borgarstjórin í Tórshavnar kommunu ikki hava sitandi á sær.

Bjarni Kárason Petersen, Framsókn

Bjarni Kárason Petersen, landsstýrismaður. (Savnsmynd: Bjarni Árting Rubeksen)

Insinuering

- Hetta eru sera álvarsligar skuldsetingar, ið verða bygdar á eitt úttalilsi frá landsstýrismanninum í lógarmálum. Hetta er ein beinleiðis insinuering um, at avgerðir hjá borgarstjóra og kommunuleiðslu byggja á persónlig sambond og mutur, skrivar Heðin Mortensen á heimasíðuni hjá kommununi.

Borgarstjórin sigur seg ikki vita, hvat ið landsstýrismaðurin sipar til, og hann væntar tí, at landsstýrismaðurin alment kemur við eini frágreiðing, hvat tað er, ið hann sipar til við hesum álvarsligu skuldsetingunum.

Ein umbering hevði eisini verið upp á pláss, skrivar Heðin Mortensen.

Við Frihedsbrevet segði Bjarni Kárason Petersen, at hann arbeiðir við at endurskoða Kommunala eftirlitið, sum hann heldur vera ov veikt, og tí má styrkjast.