Elias og Kiel spældu seg í fjórðingsfinalurnar

Elias Ellefsen á Skipagøtu skeyt fimm mál og spældi yvirhøvur ein góðan dyst, tá THW Kiel tryggjaði sær pláss í fjórðingsfinalunum í Champions League í gjár. 

Týska stórfelagið vann við einum máli á útivølli ímóti ungarska liðnum, Pick Szeged, og nú er vist, at Kiel endar fremst ella næstfremst í sínum bólki.

Kiel legði seg á odda í fyrra hálvleiki, men heimaliðið yvirhálaði seint í dystinum. Við málum frá Nikola Bilyk og Erik Johansson eydnaðist kortini at vinna dysti

Sebrurnar hava nú 20 stig, meðan Aalborg er næstfremst við 18 stigum. PSG hevur 15 stig á 3. plássi. Tvey tey fremstu liðini fara beinleiðis víðari til fjórðingsfinalurnar, meðan liðini frá 3. til 6. pláss skulu spæla eitt playoff-umfar.

Óli avgjørdi við brotskasti

Í Evropa League spældi tríggir føroyingar týsdagin.

Óli Mittún tryggjaði IK Sävehof ein týðandi útisigur á Skjern við brotskasti í evstu løtu. Sviar eru framvegis nummar trý í bólkinum, men nú er bert eitt stig upp til Skjern og tvey stig upp til Nexe á 1. plássi. Sävehof tekur ímóti Nexe í síðsta umfari.

Hákun West av Teigum og Füchse Berlin taptu aftur ímóti Sporting. Vongurin skeyt trý mál upp á fýra royndir í 32-28 ósigrinum í Lissabon. Füchse Berlin endar nú helst á 2. plássi, og skal spæla í playoff-umfarinum. 

Betri gekk hjá Jóhan á Plógv Hansen og Flensburg, sum vunnu stórt á heimavølli ímóti Vojvodina. Flensburg liggur fremst í bólkinum við átta stigum, og Bjerringbro-Silkeborg, sum tekur ímóti norðurtýskarunum í síðsta umfari, hevur seks stig á 2. plássi.