Eingin lønarhækking til løgtingsfólk, men eftirlønin verður broytt

Bjørt Samuelsen, forkvinna, Jóhannis Joensen og Johan Dahl í formansskapinum í løgtinginum taka ikki undir við tilmælinum frá arbeiðsbólkinum, sum hevur gjørt tilmæli um samsýningar og eftirlønarviðurskifti hjá løgtingsfólkum, um at hækka mánaðarlønina hjá tingfólki.

Arbeiðsbólkurin mælti at hækka lønina tveir lønarflokkar, úr góðum 46.000 kr. upp í 53.000 kr. um mánaðin, samstundis sum skattafría kostnaðarískoytið verður tikið av.

Bjørt Samuelsen, Jóhannis Joensen og Johan Dahl halda tað vera rættast, sum støðan er, ikki mæla til at broyta mánaðarlønina hjá tingfólki. 

Elsebeth Mercedis Gunnleygsdóttur, sum eisini er í formansskapinum, er ikki við at leggja uppskotið fram.

Hon sigur við Kringvarpið, at arbeiðsbólkurin var biðin um at gera eitt uppskot um lønar- og eftirlønarviðurskifti hjá tingfólki, 

Tí átti tilmælið frá arbeiðsbólkinum at verið lagt fram óbroytt, ella átti arbeiðbólkurin at verið biðin um at gera nýtt uppskot, sigur hon. 

Elsebeth Mercedis Gunnleygsdóttir, landstýriskvinna, Løgtingið, politikkur,

Elsebeth Mercedis Gunnleygsdóttur situr eisini í formansskapinum, men hon er ikki við í uppskotinum, sum nú er lagt fyri tingið. (Savnsmynd: Bjarni Árting Rubeksen)

Nýggj pensjónsskipan

Hinvegin taka tey trý, sum hava lagt uppskoið fram, undir við tilmælinum hjá arbeiðsbólkinum at fara frá tænastumannalíknandi eftirlønarskipanini til eina skipan, har landið rindar upp í 15 prosent av lønarsamsýningini í eina góðkenda pensjónsskipan.

Tey siga í viðmerkingunum til uppskotið, at undirtøka var ikki í øllum flokkum at leggja alt tilmælið frá arbeiðsbólkinum fram, men rímiliga stór undirtøka var fyri at broyta pensjónsskipanina.

Mælt verður til, at ein grein 25 nevnd við umboðum úr øllum flokkum verður sett at viðgera uppskotið. 

Nýggja lønar- og eftirlønarskipanin hjá tingfólkum kemur ikki í gildi fyrr enn eftir næsta løgtingsval. 

Les alt uppskotið her.

Hoyr samrøðu, sum Emil Lisberg Jacobsen gjørdi við Bjørt Samuelsen, løgtingsforkvinnu: