Amerikanarar seta havn upp út fyri Gaza

Hernaðarskipið, General Frank S Besson, fór úr USA í gjár, og tað fer væntandi at taka 60 dagar, áðrenn havnin er klár at brúka. 

Hernaðarskipið varð sent avstað 36 tímar aftaná Joe Biden, forseti í USA, lovaði, at flótandi havnin skuldi byggjast, fyri at gera tað lættari at fáa neyðhjálp inn í Gaza, nevniliga sjóvegis. 

ST hevur frammanundan ávarað um, at tað so at siga ikki slepst undan at hungursneyð verður í Gaza, sum støðan er, og at børn svølta.

Tað hevur víst seg at vera ógvuliga torført - og vandamikið - at senda neyðhjálp inn í landið bæði á landi og úr luftini.

Heimsmatstovnurin, World Food Programme, noyddist at steðga sínum sendingum fyribils, tí bilrøðir við neyðhjálp vórðu álopnar. Og fríggjadagin hoyrdist, at fimm fólk doyðu, og fleiri vórðu løstað, tá ein neyðhjálparpakki, sum varð sendur úr luftini, rakti tey. Tað vísti seg, at fallskíggin á pakkanum ikki lat seg upp, sum hann átti.

Tað fer sum sagt helst at taka tveir mánaðir at byggja sjóhavnina uttanfyri Gaza. - Tað er ov leingi at bíða, siga neyðhjálparfelagsskapir.

Tí varð eitt skip fylt við 200 tonsum av mati sent úr Kýpros móti Gaza seinnapartin í dag, skriva kypriotiskir miðlar, sambært bretska kringvaprinum.