Sjúkrarøktarfrøðingar minna á vallyfti um styttri arbeiðsviku

- Lógaruppskotið um at stytta arbeiðsvikuna hevur ikki sæð dagsins ljós enn. Men vit vóna, at samgongan stendur við síni lyfti. 

Hesum boðar Felagið føroyskir sjúkrarøktarfrøðingar frá í yvirlýsing eftir aðalfundin leygardagin. 

- Nú freistin er farin at bera lógaruppskot í tingið, hava vit tó einki sæð til hetta. Vit taka sum givið, at løgmaður stendur við síni vallyfti og tryggjar, at hetta lógaruppskotið verður lagt fram, skrivar felagið. 

Eingin vilji at samráðast

Felagið skrivar eisini um samráðingar og samráðingarrætt. 

- Sum fyrsta fakfelag, ið fór at samráðast, kunnu vit bara staðfesta, at samráðing er ongin, heldur tvørturímóti. Eingin vilji er at samráðast frá arbeiðsgevarans síðu, og harvið politiskari síðu, staðfestir felagið. 

At limirnir hjá felagnum vóru lóggivnir aftur til arbeiðis er ógvuliga álvarsamt, sigur Felagið føroyskir sjúkrarøktarfrøðingar.