Eingin møguleiki at kappast við Noreg og Ísland í India

Møguleikarnir hjá føroyskum fiskaútflutningsfyritøkum at taka kappingina upp í India við norsku og íslendsku kappingarneytarnar eru um at minka niður einki.

Tað sigur Vinnuhúsið í tíðindaskrivi.

Nýggi handilssáttmálin millum India og EFTA, har Noreg og Ísland eru limir, hevur við sær, at tollurin á flest øllum útflutningsvørum úr EFTA-londum hvørvur heilt næstu árini.

Vinnuhúsið vísir á, at hetta eisini er galdandi fyri laks, makrel og tosk, har tollurin verður burtur næstu fimm til sjey árini.

Hinvegin mugu føroyskar fyritøkur framvegis rinda okkurt um 30 prosent í tolli fyri flestu fiskavørur, sum tær vilja útflyta til India.

India er fólkaríkasta land í heiminum og hevur heimsins fimta størsta búskap.

Við nýggja handilssátmálanum millum India og EFTA ber ikki til hjá føroyskum fiskaútflytarum at kappast á jøvnum føti.