Aron: Hetta havi eg kempað fyri alt mítt lív

So slapp hann á vøllin. Nógv umrøddi Aron Benjaminsen úr Hearts, sum varð innkallaður í hópin til útidystin ímóti Moldova.

Eini fimm minuttir vóru eftir, tá bóltfimi vongurin kom inn, og hóast hann bert kom í eina líkinda álopsstøðu, var hann glaður fyri sín fyrsta A-landsdyst.

 - Tað er ekstremt stuttligt. Tað er hetta, eg havi kempa fyri alt mítt lív. Ein dreymur, segði Aron Benjaminsen eftir dystin.

Viljormur Davidsen legði Føroyar á odda við sínum sjeynda landsliðsmáli - seks av teimum eru komin úr 11 metrum - eftir at Géza Dávid Turi varð feldur, men eftir steðgin vóru moldavar ruddiliga omaná, og Sergiu Percuin javnaði fyrst við einum framúr góðum frísparki úr spískum vinkli í handara málhorn, og  rakti síðan bæði tvørtræ og stong, meðan føroyingarnir ikki megnaðu stórvegis annað enn at sparka burtur.

 - Ja, øgiligt ping-pong. Vit máttu bara verja, staðfesti 18 ára gamli vongurin, sum viðgekk, at hann átti at havt gjørt tað betri, tá hann einaferð fekk bóltin í brotsteiginum.