Danska verjan sinnað at gera íløgur í flogvøllin í Kangerlussuaq

Tað hevur verið ivasamt, hvat skal henda við flogvøllinum í Kangerlussuaq, ella Streymfjørðinum, nú flogvøllirnir í Nuuk og Ilulissat verða útbygdir til at gerast altjóða flogvøllir. 

Men danski verjumálaráðharrin Troels Lund Poulsen sigur, sambært grønlendska miðlinum Sermitsiaq, at danska verjumálaráðið er sinnað at gera íløgur í flogvøllin í Kangerlussuaq.

"Eg vil fegin, at vit frá danskari síðu stuðla undir at brúka Kangerlussuaq í framtíðini, og at vit tí eisini eru sinnað at gera íløgur í at varðveita kapasitetin hjá floghavnini, so at hon framvegis kann brúkast", sigur Troels Lund Poulsen, sum var á vitjan í Nuuk í gjár saman við Mette Frederiksen og Ursulu van der Leyen.

Kangerlussuaq floghavn

Danska verjumálaráðið og grønlendska sjálvstýri hava bundið seg til at halda flogvøllin í Kangerlussuaq opnan, so amerikanska verjan kann brúka hann, eisini eftir at nýggju flogvøllirnir í Nuuk og Ilulissat verða tiknir í nýtslu. 

Verjumálaráðið og grønlendska landsstýrið eru í ferð við at gera eina greining av, hvussu verjan framvegis skal brúka flogvøllin í Kangerlussuaq. Í tí greiningini - sum skuldi vera liðug síðst í hesum mánaðinum, men sum er seinkað - verður eisini kannað, hvussu grønlendski tørvurin á sivilari flúgving til og úr Streymfjørðinum verður, eftir at nýggju flogvøllirnir í Nuuk og Ilulissat eru lidnir, skrivar Sermitsiaq.