Trump: USA verður verandi í Nato, men Nato má fara væl við USA

USA verður hundrað prosent í Nato, um Donald Trump verður amerikanskur forseti aftur. Evropeisku londini skulu tó fara væl við USA.

Tað vóru boðini frá Donald Trump í samrøðu við bretsku tíðindarásina GB News.

Trump stillar uppaftur til amerikanska forsetavalið í heyst:

- Eg gjørdi Nato sterkt, og nú má Nato fara væl við USA, tí um USA ikki var, hevði Nato ikki verið til. Tey gjørdusær dælt av okkum, sum flestu lond gera, segði Trump millum annað í samrøðuni.

Donald Trump hevur fyrr funnist at limalondunum í Nato fyri ikki at rinda nóg mikið til verjusamgonguna.

Nato krevur, at limalondini brúka í minsta lagi tvey prosent av bruttotjóðarúrtøkuni til verju og trygd.