Forskattingin av pensjónum gevur meira enn hálva milliard

Inntøkurnar frá skattinum av pensjónsinngjøldum vóru um 518 milliónir krónur í 2023. Í ár verður roknað við, at upphæddin verður 520 milliónir krónur.

Skatturin er hækkaður á hvørjum ári seinastu 10 árini. Í 2014 var skatturin helvtin av tí, sum hann er nú, nevniliga 266 milliónir krónur 

Tað upplýsir Ruth Vang, landsstýriskvinna í fíggjarmálum.

Tað var Uni Holm Johannesen, løgtingsmaður fyri Javnaðarflokkin, ið spurdi, hvørjar mettu framroknaðu árligu inntøkurnar verða at forskatta pensjónir næstu 15 árini.

Røktarheimið á Mørkini, røktarheim, eldrarøkt

Mørkin í Streymnesi. Inntøkurnar frá forskattingini av pensjónsgjøldum fara allar til eldraøkið hjá kommununum. 

Veksur 3-4 prosent

Fíggjarmálaráðið metir, at inntøkurnar frá skattinum av pensjónsinngjøldum fara at vaksa 3-4 prosent árliga næstu nógvu árini.

Tó er hugsandi, at vøksturin verður nakað størri  fram  til  2026,  tí bundna  eftirlønargjaldið hækkar sambært eftirlønarlógini úr 10 prosentum í 2024 upp í 12 prosent í 2026.

Frá 2027 og frameftir verður bundna eftirlønargjaldið 12 prosent sambært eftirlønarlógini.

Síðani kommunurnar yvirtóku eldraøkið frá landinum 1. januar 2015, er allur skattur frá pensjónsinngjøldum farin til kommunurnar.