ES-tinglimur: Føroyar eiga at fáa eina betri handilsavtalu við ES

"Eg merki sum so ikki nakran óvilja móti at gera nakað við tað - tað snýr seg bara um raðfestingar."

Tað sigur Bergur Løkke Rasmussen, ES-tinglimur fyri Danmark, sum heldur, at Føroyar eiga at fáa eina betri handilsavtalu við ES.

Sum er, gera høgir tollmúrar fyri virkaðar fiskavørur, at Føroyar mestsum bara útflyta óvirkaðan fisk til ES, og tí hava Føroyar roynt at fingið eina betri avtalu við ES. 

Sambært Bergi Løkke Rasmussen, sum er hálvur føroyingur, hevur handilssáttmálin millum Føroyar og ES ikki so høga raðfesting í Evropasamveldinum.

Og hann metir tað eisini vera hugsandi og ikki órímiligt, at um Føroyar skulu fáa betri atgongd til ES-marknaðin, fer ES at seta sum krav, at føroyska samstarvið við Russland heldur uppat ella í øllum førum minkar nógv.

Hann er tó greiður yvir, at samstarvið við Russland hevur búskaparligan týdning fyri Føroyar, og at tað verður neyðugt hjá ES at geva Føroyum eitt munagott alternativ, um russiska samstarvið skal halda uppat.

Hoyrið samrøðu við Berg Løkke Rasmussen her: