Claus trýr upp á gott úrslit

Undan dystinum eru oddsini ímóti, at Føroyar gera nakað við Ísland, og eisini royna íslendingar at fylla høllina á Hafnarfirði við sínum egnu fjepparum, tí í dag er ókeypis atgongd.

Landsliðsvenjarin hjá Føroyum, Claus Mogensen ásannar, at tað kann vera gott at vera undirmettur undan einum dysti sum hesum, men fyrst og fremst verður farið eftir at taka so nógv av tí góða við sum gjørligt frá dystinum ímóti Svøríki mikukvøldið.

Tá í Føroyar og Ísland spældu í Føroyum, vann Ísland við fimm málum, og hóast tað kanska ikki verður so lætt, heldur Claus Mogensen tað ikki vera ógjørligt at venda tølunum í dystinum í dag.

Maria Pálsdóttir Nólsoy, sum sat uttanfyri mikukvøldið við einum brotnum fingri, hevur vant við í vikuni, og hóast hon neyvan fær tann stóra leiklutin í dag, er hon á dómaraseðlinum.

- Hon hevur gott spælskil, og vit koma kanska at koyra hana inn av og á, so Jana Mittún og Súna Krossteig Hansen kunnu fáa onkran lítlan steðg, sigur Claus Mogensen.

Hoyr samrøðu við landsliðsvenjaran í útvarpstíðindunum: