Paul Watson til Íslands í summar

Captain Paul Watson Foundation, sum Paul Watson hevur stovnað, boðar í tíðindaskrivi frá, at skipið John Paul DeJoria fer til Íslands í summar at forða fyri hvalaveiðu

Í fjør summar var Paul Watson við skipinum John Paul DeJoria í Føroyum. Í summar ætlar felagsskapurin hjá Paul Watson til Íslands.

Høgni Djurhuus

18.04.2024 - 10:55

Paul Watson ger nú um seg aftur. Hann boðar frá, at skip hansara, John Paul DeJoria, fer til Íslands í summar at forða fyri hvalaveiðu. Tað skrivar Captain Paul Watson Foundation, sum er ein felagsskapur, sum Paul Watson hevur stovnað, í tíðindaskrivi.

Atgerðin móti íslendsku hvalaveiðuni kallast Operation Ice Storm, og endamálið er at forða íslendska partafelagnum Hvalur at veiða hval. Eitt partafelag, sum sambært tíðindaskrivinum, er einasta felag í Íslandi og Evropa, sum veiðir stórhval.

John Paul DeJoria liggur í løtuni í Hull í Onglandi. Fólk í felagsskapinum hjá Watson vóru í Íslandi í fjør.

Meðan John Paul DeJoria var á veg til Íslands í fjør, var forboð sett fyri at skjóta hval.

Partafelagið Hvalur søkti 30.januar um loyvi at skjóta hval í summar, men felagið hevur ikki fingið svar enn.

John Paul DeJoria var eisini í føroyskum sjógvi í fjør summar.

Skiparin tá, Daniel Binyon, fekk 157.000 kr. í sekt í Føroya rætti fyri fýra lógarbrot.

Hann skeyt dómin inn fyri Landsrættin, sum viðger málið 21. august.