- Eg havi altíð sungið

Nógv børn og ung í Føroyum hava sungið hjá Sigrið Sivertsen, sum sjálv hevur sungið, alt tað hon kann minnast. 

Kór sum Ung Stjørnuskot, Xperiment og Morgunkórið hevur hon sett á stovn, og sjálvt um okkurt teirra hevur fingið nýtt flog við øðrum kórleiðara, so eru onnur komin í staðin.

Tá kórstevnan var um miðjan apríl, var Sigrið tikin á bóli, tí hon fekk Herðaklappið frá Kórsambandi Føroya fyri tað arbeiði, hon hevur gjørt fyri føroyskan kórsang.