Ikki nokk at duga føroyskt og hava góða útbúgving

Fernando Troleis úr Brasil er 38 ára gamal og búsitandi í Føroyum. Longu sum 17 ára gamal flutti hann til Føroya fyrstu ferð uttan at duga hvørki enskt ella føroyskt. Hann lærdi seg fyrst enskt, síðan føroyskt á kvøldskúlanum. Faktiskt er hann tann fyrsti í Føroyum, sum hevur staðið støðuroyndina í føroyskum á triðja stiganum.

Á kvøldskúlanum helt hann eina røðu í samband við prógvhandanina, sum ber heitið "Eg vildi fegin hava eitt pláss við borðið". Røðan kann hoyrast her:

Í røðuni fortelur Fernando, at hansara motivatión fyri at læra føroyskt var, at hann fegin fegin vildi hava eitt pláss við borðið, har tað varð samskift á føroyskum; hann vildi fegin gerast partur av tí føroyska samfelagnum.

Fernando hevur búð samanlagt 9 ár í Føroyum. Hann hevur lisið uttanlands, har hann hevur tikið eina handilsútbúgving. Eisini kann hann undirvísa í máli, sum er tað, hann kundi hugsað sær at gjørt í Føroyum.

Hóast Fernando hevur góða útbúgving og nú dugir føroyskt flótandi, so hevur hann torført við at sleppa framat reint yrkisliga. Serliga er tað føroyska lógin, sum er størsta forðingin. Av tí at Fernando er stakur, so skal hann hava búð 7 ár samanhangandi í Føroyum fyri at fáa eitt varandi innfararloyvi. Var hann giftur, so eitur tað 3 ár. Eisini hevur hansara núverandi støða við sær, at hann bert kann hava eina inntøku. Hann hevur fingið bjóðað at undirvísa nakrar tímar, bæði á kvøldskúla og á Tofta skúla, men hann kann ikki takka ja, tí hann hevur eitt fulltíðarstarv á Bakkafrosti.

Morgunsendingin tosaði við Fernando um at flyta til Føroya, um lógina og um at læra seg føroyskt. Samrøðan kann hoyrast her:

Eisini ber til at hoyra samrøðuna á enskum her: