Putin setur treytir fyri at gevast við krígnum í Ukraina

Russiski forsetin Vladimir Putin sigur í dag, at tekur Ukraina seg aftur úr Zaporizjzja, Kherson, Donetsk og Luhansk-landspørtunum, og tekur umsóknina um limaskap í Nato aftur, so er Russland til reiðar at gevast við álopunum, og fara undir friðartingingar.

Hann vissar eisini um, at álop verða ikki framd á ukrainsku deildirnar, tá ið tær taka seg aftur. 

Tað skrivar Reuters-tíðindastovan.

Hetta sigur Putin dagin fyri friðartoppfundin í Sveis, har meira enn 90 lond og felagsskapir fara at kjakast um møgliga loysn fyri kríggið í Ukraina.

Putin segði eisini, at endamálið við álopinum á Kyiv í februar 2022 var ikki at hertaka býin, men at noyða fram eina friðaravtalu við Ukraina.