Ítróttarstjórin í NSÍ lagt frá sær

Ítróttarstjórin í NSÍ, Eyðstein Skipanes, tekur nú avleiðingarnar av rokinum eftir dystin móti KÍ fríggjakvøldið 28. juni, og hann hevur lagt frá sær.

Tá dysturin var liðugur legði hann eftir dómaranum Kára J. á Høvdanum á vøllinum og eisini løtu seinni inni í Bylgjuni, har dómararnir skifta.

Týsdagin boðaði dómarafelagið annars frá, at tað ikki vildi døma heimadystir hjá NSÍ við Løkin. Men hetta bleiv tó broytt, eftir at NSÍ og Fótbóltssambandið veittu dómarafelagnum vissu fyri trygdini.

Men nú tekur fyrrverandi ítróttarstjórin avleiðingarnar. 

Í skrivinum, stílað til starvsnevndina hjá NSÍ, skrivar Eyðstein Skipanes, at hann harmast sera nógv um hendingina og biður starvsnevndina, felagnum, vaktum, leikarum, dómarum, FSF og viðhaldsfólkum um umbering.

Víðari skrivar hann, at slíkur atburður ikki hoyrir heima á fótbóltsvølli, og at hann veruliga traðkaði við síðuna av.

Sum avleiðing av hesum biður Eyðstein Skipanes starvsnevndina um at vera leysgivin frá øllum uppgávum fyri NSÍ alt fyri eitt.