Víkingur - HB: Hvønn veg fara stigini í Sarpugerði?

Meistaraheitið verður ikki avgjørt í juli. 

Kortini kann oddabrakið ímillum Víking og HB í Sarpugerði í kvøld, geva ein klára ábending um, hvar gullið í Betrideildini við monnum endar.

Vinnur Víkingur verða seks stig niður til HB og minst níggju til KÍ, og tá verða torført hjá hinum at fáa teir ljósabláu aftur.

 - Bæði liðini vita, at hesin dysturin kann flyta øgiliga nógv. Fyri Víking kann tað verða tað avgerandi lopið burtur frá HB ... fyri HB verður tað øgiliga týdningarmikið ikki at tapa dystin, segði fótbóltsviðmerkjarin, Agnar Prestá, við Televarpið. 

Málverjarnir hjá liðunum báðum eru sum vera mann varnari og vilja treyðugt siga ov nógv.

 - Vit vita, at FM verður ikki avgjørt hóskvøldið. Vit mugu bara royna at taka tað sum ein vanligan dyst. Vinna vit, er tað øgiliga gott, og javnleikur er so tað, sum tað er, segði málverjin hjá Víkingi, Bárður á Reyntrøð, við Televarpið.

 - Tað er ræðuliga týdningarmikið fyri FM-stríðið (at fáa trý stig, red.). Men tað er tað sama fyri hinar, og bæði liðini fara út fyri at vinna. Tað er so hundrað prosent sikkurt, segði Teitur Matras Gestsson við tv.fo.

_g1a1223.jpg

Tvey jøvn lið

Víkingur vann fyrsta dystin millum liðini í 2. umfari, og tey trý stigini vóru einasti munurin á stigatalvuni, til teir ljósabláu taptu fyri KÍ miðskeiðis í mai.

Síðan fylgdust liðini, til HB óvæntað tapti fyri B68 í síðstu umfari. 

Í steypakappingini er HB við yvirlutan. Teir reyðu og svørtu vunnu við einum máli, tá liðini hittust í fyrru hálvfinaluni í Havn. Í returdystinum í Norðagøtu var støðan 1-1, tá ov nógvur vindur gjørdi, at dysturin varð blástur av.

Víkingur hevur spælt gott mestsum alt kappingarárið, meðan HB trilvaði nakað fyrsta mánaðirnar, áðrenn avrikini støðugt batnaðu. Bæði liðini høvdu nógvar skaddar spælarar fyrr í kappingini, men nú eru flest allir klárir, og tí hava venjararnir báðir, Jóhan Petur Poulsen og Adolfo Sormani, nógvar møguleikar frá beinkinum.

Kringvarpið sigur frá dystinum í Sarpugerði og dystinum í Klaksvík millum KÍ og B36 beinleiðis í útvarpinum eftir tíðindasendingina á nátturða.

_g1a1174.jpg